Dili – Ohin Sesta-feira (28/3), Senior Management hamutuk ho staff Comissão Anti-Corrupção (CAC) tomak halao avaliasaun servisu primeiru trimestral tinan 2014 nian, ne’ebé staff sira mos halo aprezentasaun planu ba segundu trimester oin nian iha Salaun Delta Nova Comoro, Dili.

Objetivu halao avaliasaun servisu trimestral (Janeiru-Marsu) ne’e atu avalia performansia servisu kada diresaun nian hodi oferta solusaun ba obstakulu no hadian frakezas ruma nebe hasoru durante implementasaun programa no planu trimestral nian.

Avaliasaun servisu trimestral ne’e hanesan avaliasaun dala ikus ba Komisáriu CAC, Adérito de Jesus Soares hamutuk ho Komisáriu Adjuntus nain rua; José “Samala-Rua” António de Jesus das Neves no Manuel Bucar Corte Real molok remata sira nian knar nudar Primeiru Mandatu Komisáriu no Komisáriu Adjuntus CAC.

Avaliasaun servisu primeiru trimestral nian fahe ba sesaun rua, dader no loraik. Sesaun dadersan nian kada diresaun aprezenta atividades durante fulan tolu nian laran ne’ebé eksekuta ona hahu husi Diresaun Investigasaun, Diresaun Prevensaun, Diresaun Edukasaun e Peskiza, Diresaun Administrasaun e Finansa no aprezentasaun ikus husi Gabinete Komisáriu. Sesaun loraik nian kada diresaun aprezenta planu no programa servisu fulan tolu nian ba oin.

Molok programa avaliasaun ba periodu primeiru trimesteral 2014 remata, reprezentante husi diresaun ida-idak hato’o mensajen ikus hodi expresa gratidaun ba Komisáriu no Komisáriu Adjuntus Primeiru Mandatu no taka ho lia menon ikus husi Komisáriu Soares nia adjuntus nain rua.

Aktividades avaliasaun servisu trimestral CAC nian ne’e hanesan aktividades rutina no regular iha historia servisu Komisaun nian hahu iha loron 22 fulan Fevereiru 2010 to’o pakote Primeiru Mandatu Komisáriu CAC remata iha loron 22 fulan Fevereiru 2014. Komisáriu Soares nia lideransa durante tinan hat nia laran CAC konsege rekruta staff hamutuk nain 71. Staff hirak ne’e halao knar tuir misaun CAC nian; investigasaun criminal, prevensaun korrupsaun nune’e mos halao konsiensializasaun ba publiku kona-ba esforsu funu kontra korrupsaun. (*)

Post ida ne'e mos Avalia iha: English