Uncategorized

CAC Kontinua Eduka Seitór Privadu Iha Distritus Ba Prevene Korrupsaun

husi

Liquiça – Empresariu lokal liu 100 iha distritus rua, distritu Aileu ho Liquiça semana ne’e asesu ba informasaun kona-ba esforsu luta kontra korrupsaun liu husi seminariu ne’ebé organiza husi Comissão Anti-Corrupção (CAC).

Seminariu iha distritu Aileu halao iha loron Tersa-feira (27/5) no Distritu Liquiça iha Salaun Sentru Toko Dede iha loron Kinta-feira (29/5) ohin.

Workshops iha distritus rua diferente ne’e ho topiku “Papel Setór Privadu ba Fortifikasaun Dezenvolvimentu Nasionál: Kontestu Prevensaun Korrupsaun”. Ida ne’e konsistente ho Planu Prevensaun CAC ba tinan 2014-15 nian, iha ne’ebé fokus liu iha area prioridade hat inklui Aprovizionamentu. Areas prioridade tolu seluk mak Desentralizasaun Poder Governu, Alfandega, no Vontade Politiku.

Objetivu seminariu ne’e atu eduka emprezariu lokal ne’ebé halibur malu iha organizasaun emprezarial ho naran Camara Comercio e Industria Timor-Leste (CCI TL) nudar parseiru governu atu hetan informasaun oin sa prevene pratika subornu ka korrupsaun hodi dezenvolve rai doben TL iha transparansia no dignidade nia leten.

“Ami ohin mai iha ne’e atu koalia ho ita boot sira husi fuan ba fuan nudar Timor oan atu ita konstrui nasaun TL iha transparansia nia leten la ho subornu no korrupsaun,” katak orador uniku seminar ohin, Direitur Prevensaun Abrão Jose Freitas ba partisipantes sira.

“Diak liu ita prevene duke ita monu iha pratika korrupsaun ne’ebé bele fo konsekuensia ladiak ba familia nia naran diak, dignidade, honra no privileiju nudar Timor oan.”

Prezidenti CCI-TL Distritu Liquiça, Vicenti da Conceição lori naran emprezarius Liquiça oan sira agradese ba prezensa ekipa CAC iha distritu hodi fahe informasaun no eduka seitor privadu kona-ba Timor oan sira nian esforsu ba luta kontra korrupsaun.

Emprezarius lokal iha distritus Aileu no Liquica ho antusiasmu boot partisipa ativamente durante workshop to’o nian rohan. Emprezariu sira rekomenda ba CAC atu nia “manu ain” sira regularmente desloka ba iha distritus hodi monitoriza sedu prosesu ekzekusaun projeitu estadu husi kompanha lokal sira iha distritus hodi garante kualidade projeitu.

CAC firmi fiar metin ba Timor oan hotu – tantu sira lider komunitariu, husi seitor privadu ka governu, ou elementus públiku – tenki involve iha kombate korrupsaun iha Timor-Leste. Ami sei kontinua halao workshops hanesan ho seitor privadu iha tinan tomak. (*)

 

Post ida ne'e mos Avalia iha: English

Previous postEransa Ida Nebé Lori CAC Ba Iha Futuru Next postAvizu rezultado, Re-Tender no Kotasaun Foun

Popular

CAC Kontinua Eduka Seitór Privadu Iha Distritus Ba Prevene Korrupsaun