Featured Stories

CAC Realiza Workshop Ho Seitór Púliku-Privadu Iha Distritu Oe-cusse Ba Prevene Korrupsaun

husi

Pante Macassar – Funsionariu Estadu hamutuk ho Empresariu lokal liu 100 iha Distritu Oecusse asesu ba informasaun kona-ba esforsu luta kontra korrupsaun liu husi workshop ne’ebé organiza husi Comissão Anti-Corrupção (CAC).
Workshop ne’e halao iha Salaun Administrasaun Distritu Oeccuse iha loron Kuarta-feira (1/10) ohin. Oradores importante iha workshop loron tomak ne’e mak Komisariu CAC Dr. Adérito António Pinto Tilman, Administrador Distritu Oecusse Salvador da Cruz no Prezidenti Camara Comercio no Industria (CCI) Distritu Oe-cusse, Bartolomeo Siqueira ne’ebé modera husi Diretor Prevensaun Abrão José Freitas.
Workshop ne’e ho topiku “Identifika Problema Hodi Infrenta Dezafius, Obstakulu No Fó Solusaun”. Ida ne’e konsistente ho Planu Prevensaun CAC ba tinan 2014-15 nian, iha ne’ebé fokus liu iha area prioridade hat inklui Aprovizionamentu. Areas prioridade tolu seluk mak Desentralizasaun Poder Governu, Alfandega, no Vontade Politiku.
Objetivu seminariu ne’e atu fahe informasaun kona-ba lei CAC no prosedimentu legal sira seluk. Oportunidade ne’e mos atu eduka servidor Estadu iha rejional Oecusse no emprezariu lokal sira ne’ebé halibur malu iha organizasaun emprezarial ho naran Camara Comercio e Industria Timor-Leste (CCI TL) nudar parseiru governu atu hetan informasaun oin sa prevene pratika subornu ka korrupsaun hodi dezenvolve rai doben TL iha transparansia no dignidade nia leten.
“Ami nian prezensa iha ne’e atu hadian konesimentu seitor publiku no privadu kona-ba lei CAC no prosedimentu legal anti-korrupsaun atu konstrui nasaun TL ne’e iha transparansia nia leten la ho subornu no korrupsaun,” katak Komisariu CAC Dr. Adérito Tilman ba partisipantes sira.
“Ita nian sorumutu loron ohin hanesan estratejia ida atu redus risku pratika mal-administrasaun no krimi korrupsaun,” katak Komisariu Tilman.
Prezidenti CCI-TL Rejional Oecusse, Bartolomeo Siqueira lori naran emprezarius Oe-cusse oan sira agradese ba prezensa ekipa CAC iha distritu Oecusse hodi fahe informasaun no eduka seitor privadu kona-ba Timor oan sira nian esforsu ba luta kontra korrupsaun.
Funsionariu Estadu no emprezarius lokal iha Oe-cusse ho antusiasmu boot partisipa ativamente durante workshop to’o nian rohan. Emprezariu sira rekomenda ba CAC atu nia “manu ain” sira regularmente desloka ba iha distritus hodi monitoriza sedu prosesu ekzekusaun projeitu estadu husi kompanha lokal sira iha distritus hodi garante kualidade projeitu.
CAC firmi fiar metin ba Timor oan hotu – tantu sira lider komunitariu, husi seitor privadu ka governu, ou elementus públiku – tenki involve iha kombate korrupsaun iha Timor-Leste. Ami sei kontinua halao workshops hanesan ho seitor privadu iha tinan tomak. (*)

Post ida ne'e mos Avalia iha: English

Previous postKomisariu Comissão Anti-Corrupção (CAC), Dr. Adérito Tilman akompanha husi Komisariu Adjuntu Manuel Bucar no Asesor Jonas Guterres ohin dader (18/9) simu vizita kortezia ida husi Ambassador Portugal mai Timor-Leste, Dr. Manuel Gonçalves de Jesus iha Edifisiu CAC Farol, Dili. Objetivu husi sorumutu ne’e parte rua deskute posibilidade hahu programa kooperasaun entre CAC, Polisia Judisial Portugal no Edifisiu Ministerio Públiku TL iha area prevensaun no investigasaun krimi korrupsaun. Next postStaff CAC Konklui On Job Training Iha KPK Ho Susesu

What do you think?

Name required

Website

Popular

CAC Realiza Workshop Ho Seitór Púliku-Privadu Iha Distritu Oe-cusse Ba Prevene Korrupsaun