Featured Stories

Staff CAC Konklui On Job Training Iha KPK Ho Susesu

husi

Fober CAC-KPK_V2 Jakarta – Atu kapasita staff no mantein kualidade servisu diak ba ezistensia Comissão Anti-Corrupção (CAC) iha prevene no kombate korrupsaun, ofisial nain 10 CAC nian ba halao on-job training iha Komisi Pemberantasan Korupsi (KPK) Jakarta, Indonesia durante semana tolu (13-31/10). On Job Training ne’e finansia husi GIZ liu husi kooperasaun bilateral entre governu TL no Republika Federal Alemanha.

Objetivu husi on-job training ne’e atu kapasita staff liu husi prosesu estuda no fahe matenek no esperiénsia ba malu ho instituisaun KPK Indonesia ne’ebé iha prestasaun diak iha prevene no kombate korrupsaun.

Delegasaun CAC hamutuk nain 10 lidera husi Sekretariu Ezekutivu Alexander Freitas simu diretamente husi komisioner KPK nain tolu; mak Abraham Samad, Bambang Widjojanto no Zulkarnain iha edifisiu KPK Kuningan Jakarta.

Ketua KPK Abraham Samad espresa nian haksolok hodi hato’o obrigado no agradese wain ba lideransa instituisaun CAC TL nian ne’ebé desidi haruka nian ofisials nain 10 bele estuda no fahe esperiensia iha KPK kona-ba luta prevene no kombate korrupsaun. Abraham fahe esperiensia kona-ba tinan 11 KPK eziste. Hahu husi infrastruktura ne’ebé limitadu, personel sira ne’ebé limitadu mos to’o teritoriu nasaun Indonesia nian ne’ebé luan no boot tebes.

“Karik ida ne’e impossible. Maibe, ho esforsu no servisu maka’as, alhamdulillah ami bele kontinua eziste nafatin hodi kombate korrupsaun iha ami nian rai indonesia.” Katak Ketua KPK Abraham Samad wainhira simu delegasaun CAC nian iha loron Segunda-feira (13/10) iha Jakarta.

Ho limitasaun sira ne’ebé iha, katak Abraham, KPK desidi ho firmeja eskalaun kazu korrupsaun sira. Maibé, Samad lamenta durante sira nian dedikasaun servisu ba rai Indonesia ba prevene no kombate korrupsaun, iha liafuan todan no moruk wai’n mak KPK simu husi sosiedade lubun balun katak KPK halo “tebang pilih-eskolhidu”.

“Iha skala prioridades, ami mos fokus iha area sira hanesan seitor lubun balun, mak hanesan ketahanan energi dan lingkungan, pertahanan plus, pendapatan dan infrastruktur. Ami hare’e seitor hat ne’e nian servisu importante tebes tamba kona-ba ema barak nian moris,” katak Abraham Samad.

Wakil Ketua KPK Bambang Widjojanto aumenta liu tan, KPK konsiente katak korupsaun iha Indonesia diferente ho pratika korrupsaun ne’ebé akntese iha nasaun seluk iha mundo. “Iha ami nian rai Indonesia ne’e pratika korrupsaun masivu tebes, sistematiku no ho meius organizadu. Tamba ne’e, kombate mos tenki halo ho progresivu,” katak Bambang Widjojanto refere ba integrasaun entre programa investigasaun no prevensaun.

Iha fatin hanesan, Komisariu CAC Adérito Tilman hato’o obrigado wai’n ba KPK ne’ebé ho laran diak bele simu delegasaun CAC TL hodi mai estuda no gainha esperiensia ba prevene no kombate korrupsaun husi KPK nian esperiensia.

Komisariu Tilman konsiente katak esforsu kombate korrupsaun nudar knar no servisu ne’ebé todan wai’n. “Tamba ne’e mak esforsu ne’ebe ami halo mak haruka delegasaun mai estuda husi KPK nian esperiensia iha luta prevene no kombate korrupsaun,” katak Komisariu Tilman.

Komisariu Tilman espera, membru delegasaun CAC nian bele uza oportunidade murak mean ne’e hodi gainha esperiensia ho optimal ba benefisiu rai doben Timor-Leste iha luta prevene no kombate korrupsaun. (*)

Post ida ne'e mos Avalia iha: English

Previous postCAC Realiza Workshop Ho Seitór Púliku-Privadu Iha Distritu Oe-cusse Ba Prevene Korrupsaun Next postCAC-KPK Formaliza Kooperasaun Bilateral

What do you think?

Name required

Website

Popular

Staff CAC Konklui On Job Training Iha KPK Ho Susesu