Featured Stories

Senior Management CAC Halo Audiensia Kortejia Ho Nai Prezidenti Republika TMR

husi

IMG_2705Dili – Senior Management Comissão Anti-Corrupção (CAC) lidera husi Komisariu Dr. Adérito Tilman ohin (3/3) loron Tersa-feira halo audiensia kortejia ho Nai Prezidenti da Republika Taur Matan Ruak (TMR) iha Palacio Prezidenti Nicolau Lobato Aitarak Laran Dili.

Objetivu husi audiensia kortejia ne’e atu informa ba Nai Prezidenti Republika kona-ba Planu Estratejiku Nasional CAC nia ba tinan 2012-2020. Vizaun ba 2020; “Timor-Leste Estadu Demokratiku ida ho kultura rejeisaun korrupsaun ida mak forte ba interese no prosperidade povu nian”.

CAC hahu nia servisu iha tinan 2010 ho misaun “Kombate korrupsaun liu husi Edukasaun, Prevensaun no Investigasaun – represaun ho voleres importante hanesan Kredibilidade no transparensia, Assertividade no integridade, Konsistensia no persistensia (KAK) iha nia asaun.

Iha sorumutu ne’e Senior Management CAC mos hato’o ba Nai Prezidenti da Republika TMR kona-ba Prioridade Estratejiku ba Segundu Mandatu liu-liu tinan 2015 inklui prepara ona esbozu kontributu ba Lei Anti-Korrupsaun ne’ebe sei hatama ba Meza Parlamentu atu halo diskusaun no aprovasaun iha tempu badak. Koalia mos kona-ba esbozu Lei Organika CAC nian ne’ebé sei define estrutura instutisaun CAC liu-liu rekrutamentu, renumerasaun, no retensaun ba funsionariu CAC no Estratejia Nasional Kombate Korrupsaun (ENKK).

Planu Estratejia Nasional Kombate Korrupsaun (ENKK) hanesan obrigasaun Estadu Parte ba Konvensaun Nasoens Unidas Kontra Korrupsaun (UNCAC) ne’ebe Timor Leste asina iha 10 Dezembru 2003 no Parlamentu Nasional ratifika Konvensaun ne’e iha 10 Dezembru 2008.

Rezolusaun Governu No. 2/2011 ne’ebé nomeia CAC hanesan fokal point relasiona ho implementasaun UNCAC. CAC oras ne’e lidera prosesu atu establese Grupu Trabalhu ba Implementasaun Konvensaun Nasoens Unidas Kontra Korrupsaun (UNCAC) ne’ebe kompostu representante husi Governu, Presidenti da Republika, Institusaun Judiciaria, Institusaun Polisia, Akademiku, Seitur Privadu, Sociedade Civil no Media.

Iha audiensia kortejia ne’e mos koalia kona-ba kolaborasaun institusional ho institusaun konjere iha rai laran no kooperasaun institusional ho ajensia anti-korrupsaun iha rejiaun. Senior Management CAC mos informa ba Nai Prezidenti Republika TMR katak CAC formaliza tiha ona agrementu kooperasaun institusional ho Komisi Pemberantasan Korrupsi (KPK) iha loron 30 Outubru 2014 no agora atu tama iha fase implementasaun.

CAC mos iha prosesu nia laran atu formaliza agrementu kooperasaun ho Malaysia Anti-Corruption Commission (MACC), Commission Against Corruption of Macao SAR no Independent Commission Against Corruption (ICAC) Hongkong, China.

Area kooperasaun ho ajensia sira ne’e fokus iha area hanesan treinamentu no hasae kapasitasaun, prevensaun, Asistensia Legal Mutual no seluk-seluk tan.

Akompanha Komisariu Dr. Adérito Tilman iha audiensia kortejia ho Nai Prezidenti Republika TMR mak KOmisariu Adjuntu nain rua; José “Sama larua” Neves, Manuel Bucar no Adviser Nasional Jonas Guterres. (*)

Post ida ne'e mos Avalia iha: English

Previous postPM Rui Maria Araujo Vizita CAC Next post Projetu MDG’s iha Munisípiu Covalima la iha kualidade no balun abandonadu

What do you think?

Name required

Website

Popular

Senior Management CAC Halo Audiensia Kortejia Ho Nai Prezidenti Republika TMR