Featured Stories

CAC Laos atu Halo Inimigu ba Jerente Estado TL

husi

Dili – Komisariu Commissão Anti Corrupção (CAC) Dr. Sergio Hornai sai orador principal iha komemorasaun Loron Alfandega Timor-Leste ba dala 19 ho topiku “Konseito Korrupsaun iha Instituisaun Governu” iha Auditorium Ministerio Finansas Aitarak Laran Dili Segunda-feira (28/1).

Komisariu Hornai sai orador ba Dahuluk nian iha komemorasaun ida ne’e hafoin ofisialmente simu posse nudar Komisáriu CAC foun iha resintu PN iha loron Segunda-feira (21/1) liu ba.

Iha ninian intervensaun, Komisariu Hornai afirma Commissão Anti Corrupção nian pozisaun nudar parseiru importante ba instituisaun Estado hotu iha Timor-Leste (TL) no laos sai inimigu ba jerente Estadu sira atu servi povu ho nasaun doben Timor-Leste.

“CAC mai laos atu halo inimigu ba iha funsionariu ida-idak ka dirijente funsionariu direta ka indireta iha instituisaun Estado ninian,” Katak Komisariu Hornai.

“Maibe, CAC mai ho vizaun ida klaru katak simu atribuisaun kompetensias ne’ebé mak iha, simu misaun ne’ebé mak iha liu husi nian vizaun ida katak hakarak hametin no hametin deit Estado direitu demokratiku ida ne’ebé hatuur iha lei. Dever no obrigasaun Timoroan sira nian labele sees aan husi neba,” Komisariu Hornai Hatutan teni.

Komisariu Hornai lori CAC nian naran hatoo parabens no kongratula Alfandega neebé simu responsabilidade boot ho ninian prestasaun servisu iha servisu durante tinan 19 nian laran ba povu no nasaun doben Timor-Leste.

Komisariu taka ninian intervensaun hodi kongratula funsionariu publiku tomak neebé servisu la sente kolen iha departamentu ida ne’e durante tinan 19 nian laran…. no hateten ba sira; “Ita boot sira halo tiha ona servisu diak no ami orgulho ba ita boot sira ninian komitmentu no dedikasaun hodi servi ita nian povu no hau hakarak konvense ita boot sira katak ita boot sira hanesan parseiru CAC nian neebé diak”, Komisariu afirma. (*)

Post ida ne'e mos Avalia iha: English

Previous postPN Hili Sergio Hornai Sai Mandatu Datoluk Komisariu CAC Next postEmbaixadora EUA iha TL Visita Comissão Anti-Corrupção

Popular

CAC Laos atu Halo Inimigu ba Jerente Estado TL