Featured Stories

Komisáriu CAC Dr. Sergio Hornai Aprezenta Relatoriu Annual 2018 ba PN

husi

Dili – Segunda-feira (3/6), Komissáriu Comissão Anti-Corrupção (CAC) Dr. Sergio Hornai akompanha husi estrutura ba aprezenta Relatóriu Annual iha Parlamento Nacional (PN). Relatório Anual 2018 ne’ebé abranje 119 pájinas ne’e nudar relatóriu dahuluk aprezenta husi Mandatu Terseiru.

Relatóriu komunika rezultadu implementasaun programas ho ninian atividades husi mandatu anteriores. Relatóriu ne’e hatudu katak maske CAC hasoru dezafius lubun balun hanesan impasse polítiku no absênsia  Komissáriu nian durante fulan hitu (7) nian laran, maibe estrutura CAC konsege implementa maioria atividades neebé refleta programas Komisaun nian.

Komissáriu relata ba Parlamento Nacional katak tinan 2018, Diresaun Investigasaun detekta 81 kazus korrupsaun, no investigador sira kompletu relatóriu preliminar hamutuk 21 kazus hodi haruka ba Gabinete Procuradoria Geral (GPG). Nune’e mos, halao investigasaun 49 kazus korrupsaun (iha ne’ebe 42 kazus korrusaun delega husi GPG iha tinan 2018 no 7 kazus mai husi tinan anterior), no CAC konsege kompleta relatóriu final hamutuk 36 kazos. Durante investigasaun, CAC investiga sasin nain hamutuk 748 no suspeitus hamutuk 55.

Hanesan aprezenta husi Komissáriu Hornai, aktu pekulatu mak domina kazus korrupsaun, tuir mai abuzu poder, mal-administrasaun, falsifikasaun dokumentus, partisipasaun ekonomia iha negosiu, pekulatu uzu no subornu.

Diresaun Prevensaun implementa programas konsiensializasaun balun ba iha eskolas ensinu baze ba too iha nível universidade, sentru joventude no realiza workshops ba instituisaun estadu sira. Diresaun ida nee mos halao monitorazasaun no inspeksaun lubun balun ba iha eskolas no instituisaun estadu sira ne’ebé mak iha indikasaun risku korrupsaun.

Nune’e mos, atu reforsa kooperasaun ho entidades seluk, Komisaun assina tiha ona MoU ho Unidade Informação Financeira (UIF) iha Banku Sentral no mos ho Programa Nasoens Unidas ba Desenvolvimento (PNUD) iha area prevensaun korrupsaun. Komisaun mos mantein kooperasaun diak no kontaktu regular ho embaixada Estadus Unidus América (EUA) iha Díli, no mos ho UNODC atu melhora kapasidade Especialista Anti-Korrupsaun (EAK), liu husi formasaun lubuk ida iha rai laran no mos iha rai liur.

Komissáriu mos foti dezafius sirak neebé CAC hasoru hanesan limitasaun rekursus, falta instrumentus legal no kooperasaun institusional, sujere rekomendasaun lubun ida ba Parlamento Nacional atu haforsa CAC hodi melhora liu tan Komisaun nian funsaun iha luta kontra korrupsaun. (*)

Post ida ne'e mos Avalia iha: English

Previous postEAK Konklui Formasaun Loron Tolu Sobre Anti-Corruption & Financial Investigations Suporta husi U.S. OPDAT Next postNomeasaun Komisariu Adjuntus CAC Nain 3: Sinal Esperansa no Promessa

Popular

Komisáriu CAC Dr. Sergio Hornai Aprezenta Relatoriu Annual 2018 ba PN