Featured Stories

EAK Nain 25 Remata Formasaun Prevensaun Korrupsaun Oferta Hosi ICAC HK

husi

Dili – Espesialista Anti-Korrupsaun (EAK) hamutuk nain 25 iha Comissão Anti-Corrupção (CAC) remata sira ninian formasaun durante loron ne’en (6) oferta hosi Independent Commission Against Corruption (ICAC) Hong Kong (HK) Republika Popular China ho topiku “ICAC Outreaching Training Programme for Commission Against Corruption Timor-Leste” Kinta-feira (15/8) semana nee iha Hotel Ramelau Aimutin Dili.

Objetivu hosi formasaun ne’e atu haforsa no haklean konhesimentu  prevensaun korrupsaun ba EAK sira ne’ebé haknar an iha Diresaun rua; Diresaun Servisu Apoiu Kooperasaun no Prevensaun no Sensibilizasaun. Formasaun nee hetan akompanhamentu hosi Senior Management CAC Komisáriu Dr. Sergio Hornai, Komisáriu Adjunto ba Prevensaun no Sensibilizasaun Dr. Luis Sampaio no Komisáriu Adjunto ba Asuntu Apoiu Kooperasaun Dr. Alexandre Freitas too remata.

Komisáriu CAC Dr. Sergio Hornai lori CAC Timor-Leste nian naran agradese ba ICAC ne’ebé maske ho Estado Hong Kong oras nee sofre hela prosesu demokratizasaun maibe kontinua ho komitmentu boot tulun CAC iha prosesu formasaun ba EAK Timor-Leste.

“Lori Komisaun nian naran ho estrutura tomak hakarak sauda ita boot (ICAC HK) mesmu Estado HK oras nee sofre no hasoru hela prosesu demokratizasaun ida makaas maibe bele mai too iha Timor hodi partilha ho ami (CAC sobre prevensaun korrupsaun). Ami agradese ba ida nee no espera Estado no povu HK Republika Popular China sei hamutuk ho ami hodi hametin instituisaun (CAC),” Katak Komisariu Sergio Hornai.

Programa formasaun ho topiku “ICAC Outreaching Training Programme for Commission Against Corruption Timor-Leste” nee util tebes ba EAK sira no Komisariu Sergio Hornai husu ba EAK sira uza oportunidade formasaun nee ho didiak atu bele benefisia Komisaun iha area prevensaun kriminalidade korrupsaun iha future.

Formasaun nee fahe ba parte rua no iha parte dahuluk aprezenta formadores Florence Au no Joe Tam ho materias sobre; an overview of the work of the ICAC HK, strategies for community education and public engagement, youth and moral education, sustaining public sector integrity, promoting business sector integrity, use of mass and news media and show case of ICAC HK.

Parte Daruak aprezenta formadores Mandy Lee Man-Yu no Man Chan ho materias sira mak; Institutional Framework Theory for the Prevention of Corruption, Civil Service Integrity – Management of Declared Conflict of Interest, Corruption Prevention in Licencing and Inspection, Corruption Prevention in Public Procurament, Corruption Prevention in Constructions Works no Corruption Prevention in Administration of Funding Scheme.

Komisáriu Adjunto ba Prevensaun no Sensibilizasaun Dr. Luis Sampaio ofisialmente taka formasaun nee hatoo agradesementu ba formadores sira hosi ICAC HK neebe durante loron neen (6) troka malu fahe ona ICAC nian esperensia sistema, mekanismu no estratejia servisu prevensaun korrupsaun nian mai CAC Timor-Leste.

“Formasaun ida ne’e util tebes ba CAC hodi hasae kapasidade rekursu EAK nian liu-liu iha kontekstu Timor-LEste nian. Espera katak kooperasaun ida ne’e bele fo benefisiu entre CAC ho ICAC no sei kontinua iha futuru.” Katak Komisariu Adjunto Sampaio. (*)

Post ida ne'e mos Avalia iha: English

Previous postNomeasaun Komisariu Adjuntus CAC Nain 3: Sinal Esperansa no Promessa Next postTimor-Leste Performance of the Mechanism for the Review of Implementation of the UNCAC First Resumed Tenth Session of the Implementation Review Group 2 – 4 September 2019 Vienna International Centre

Popular

EAK Nain 25 Remata Formasaun Prevensaun Korrupsaun Oferta Hosi ICAC HK